”Біз біргеміз: ортақ өнер, ортақ жүрек”

2 сәуір – Дүниежүзілік аутизм мәселесі туралы ақпаратты тарату күні

Ерекше қажеттіліктері бар балаларды қолдау – біздің ортақ міндетіміз!

IV Ұлттық құрылтай отырысында Қазақстан Президенті Қасым-Жомарт Тоқаев ерекше қажеттіліктері бар әрбір балаға толыққанды білім алу үшін тең мүмкіндіктер беру маңызды екенін атап өтті. Бұл жай ғана құқық емес, әр баланың табысты және бақытты болашағының негізі.

Осыған байланысты, оқушыларымызды кешенді қолдауды қамтамасыз ететін жаңа Заң әзірлеу туралы шешім қабылданды. Бұл заң қолжетімді білім беру ортасын құруға, оқыту сапасын жақсартуға және барлық балаларды әлеуметтендіруге бағытталады. Осыған орай, 2025 жылдың 2 сәуірінде Әлихан Бөкейхан атындағы №76 мектеп-лицейде балалардың шығармашылық қабілеттерін дамыту және ата-аналармен бірге олардың өнерге деген сүйіспеншілігін арттыру мақсатында «Біз біргеміз: ортақ өнер, ортақ жүрек» атты оқушылар мен ата-аналарға арналған шығармашылық алаң өтті.

Іс-шараның басталуында мектеп директоры Б.Сейдеш қатысушыларды құттықтап, өз сөзінде осындай шаралардың балалардың дамуындағы маңыздылығын атап өтті. Ал директордың оқу ісі жөніндегі орынбасары Д.Касимова құндылыққа негізделген «Айналмалы шаңырақ» әдісін қолдана отырып, қатысушыларға арнайы тапсырмалар ұсынды. Осы тапсырмалар арқылы оқушылар мен ата-аналар бірнеше шығармашылық алаңдарға бөлініп, өз өнерлерін ортаға салуға мүмкіндік алды.

Алаңдарда мектептің арнайы мамандары - мектеп психологтары Ж.Саркина мен М.Қуандық, арнайы педагог Ж.Атығай, логопед Д.Баимбетова, педагог-ассистенттер Қ.Қолданбаева, С.Сабыржанов, Ш.Жасымбеков және С.Тағыберген әр түрлі тақырыптар бойынша жұмыс жүргізді. Алаңдардың әрқайсысы ерекше және шығармашылық тұрғыдан қызықты болды:

• «Бірге сурет салайық» (ART терапия): Қатысушылар өздерінің ішкі әлемін бейнелеу арқылы шығармашылықтың қуатын сезінді.

• «Қызықты театр» (Рөлдік ойындар): Оқушылар мен ата-аналар театр сахнасында өз өнерлерін көрсетіп, актерлік қабілеттерін шыңдады.

• «Дыбыс және қозғалыс» (Мультимедиялық-шығармашылық жұмыс): Мультимедиялық құралдар арқылы шығармашылық жұмыстар атқарылды, бұл жаңа технологиялардың мүмкіндіктерімен танысуға жол ашты.

• «Қиял әлемі» (Жасанды интеллект): Әрбір қатысушы заманауи технологиялардың көмегімен өз қиялын жүзеге асырды.

Сонымен қатар, «Жолда жүру ережесі» тақырыбында бастауыш сынып мұғалімдері Л.Әбдір мен Г.Бакитова жүргізген жарысқа оқушылар белсенді қатысып, қауіпсіздік ережелерін сақтау жөнінде білімдерін көрсетті.

Іс-шараның соңында балалардың өнерге деген сүйіспеншілігін арттырып, олардың шығармашылық әлеуетін кеңейту жұмысында оқушыларымыз ән салып, би билеп, өз өнерлерін ортаға салды. Мектеп директоры Б.Сейдеш жеңімпаздарды дипломдармен марапаттап, ата-аналар мен мұғалімдерді балаларының дамуына қосқан үлестері үшін алғыс хаттармен марапаттады. Ата-аналарға балаларын тәрбиелеуде көрсеткен белсенділігі үшін, ал мұғалімдерге оқушыларды жан-жақты дайындаудағы еңбектері үшін арнайы алғыс білдірді.

Кештің соңында ата-аналар мен оқушылар мектеп ұжымына, арнайы мамандарға шын жүректен алғыстарын білдіріп, іс-шараның жоғары деңгейде ұйымдастырылғанын ерекше атап өтті.Мектепте өткен бұл ерекше кеш, ата-аналар мен оқушылар арасындағы ынтымақтастықты арттырып, шығармашылық мүмкіндіктердің шексіз екендігін тағы бір рет дәлелдеді.